Frestur til umsagnar um drög að Grænbók um samgöngumál var veittur frá 6. júlí til 10. ágúst 2021
Grænbókin var birt 6. júlí sl. og leigubifreiðastjórum gefinn kostur á að veita þá umsögn sem hér má lesa.
https://samradsgatt.island.is/oll-mal/$Cases/Details/?id=3011
Efni: Umsögn B.Í.L.S. um Grænbók um samgöngumál.
Mál nr. 142/2021
B.Í.L.S. Bandalag íslenskra leigubifreiðastjóra vill þakka fyrir að fá tækifæri til þess að koma skoðunum sínum á framfæri og bendir á að leigubifreiðastjórum hefur ekki verið boðið til málefnalegrar þátttöku fyrr en á þessu stigi.
Leigubifreiðastjórum þykir nauðsynlegt að minna á hlutverk sitt í samgöngum, enda er ekki minnst á leigubifreiðar í Grænbókinni.
Þegar samgönguleiðir sameina ekki erindi farþega í vegalengd og tíma, kemur leigubifreið að góðu gagni til þess að brúa bilið. Því verður að hafa hugfast og tryggja að almenningur haldi áfram góðu og sýnilegu aðgengi að leigubifreiðum við helstu skiptistöðvar almenningsvagna, samanber við Hlemm. Á teikniborði skipulagsviðs Reykjavíkurborgar (deiliskipulag fyrir Hlemm, 16. janúar 2020, Hlemmur reitur 1.240.0) eru áform um að færa leigubifreiðstæðið við Hlemm í aðra götu, óákveðna staðsetningu sem gæti þá verið úr augsýn farþeganna sem munu stíga úr almenningsvögnum eða Borgarlínu við Hlemm. Á þannig stað vegur þyngst að farþegar sem eiga síður gott með gang, aldraðir, sjónskertir, fatlaðir og einstaklingar með þungan farangur, njóti aðgengis að leigubifreiðum auðveldlega.
Frá Akureyri er svipaða sögu að segja, þar sem bæjaryfirvöld vilja að Bifreiðastöð Oddeyrar víki frá upphaflegri staðsetningu sinni við Strandgötu í miðbænum yfir á ónefndan stað, þá líklega fjarri þeirri samgöngumiðju sem miðbærinn gegnir á Akureyri.
Bæta má við þessi tvö mál að ákveðnir hópar ferðast meira með leigubifreiðum en öðrum ferðamáta.
Hvað snertir uppbyggingu innviðanna mætti skýra betur hlutverk þeirra hvers og eins, sem koma frekar óljóst fyrir sjónum í lesmáli Grænbókar. Leigubifreiðastjórum þykir þörf á að efla eftirlit með öllum samgöngum til að tryggja að rétt sé farið með fólksflutninga gegn gjaldi, sem mun skila sér bæði í hagsmunum og öryggi farþeganna jafnt sem rekstaraðila.
Stöðumat á umferðaröryggi
Leigubifreiðastjórum þykir vanta umræðu um þá þróun sem á sér stað með fjölgun rafknúinna hlaupahjóla í umferð, þar sem allir aldurshópar stofna oft bersýnilega sjálfum sér og öðrum í hættu á ótryggðum tækjum. Rafknúin hlaupahjól í einkaeigu eru sögð ná allt að 70 km hraða á jafnsléttu. Í tilvikum óhappa er tjónþolinn gerður ábyrgur fyrir þeim skaða sem af hlýtur, en ekki tjónvaldurinn, samkvæmt upplýsingum frá íslensku tryggingafélagi. Taka má dæmi akandi eða kyrrstæðrar bifreiðar sem hlaupahjól hafnar á. Hlaupahjólið ber enga tryggingu og tekur því trygging bifreiðarinnar við ábyrgðinni. Hlaupahjólin sjást iðulega á götunum, enda sléttara yfirborð og hraðar yfirferðar. Samkvæmt umferðarlögum mega slík tæki ekki aka á akbraut.
Fjármögnun innviða
Í ljósi umræðunnar um hugsanlega vegtolla og að flýta orkuskiptum, vilja leigubifreiðastjórar benda á að hvorki er sanngjarnt né tímabært að mismuna eigendum og notendum ökutækja vegna útblásturs. Að sjálfsögðu styðja allir útblástursfría stefnu, en það verður að taka tillit til þess að enn eru ekki komin á markað útblástursfrí ökutæki sem uppfylla alla þjónustueiginleika leigubifreiða, svo sem í stærðarflokki, burðargetu og drægni. Það geta verið nauðsynleg ökutæki fyrir hjólastóla, vetrarakstur eða sérstök skilyrði sem krefjast eiginleika bifreiða sem ganga fyrir eldsneyti.
B.Í.L.S. Bandalag íslenskra leigubifreiðastjóra 10. ágúst 2021